100 n yiseggasen aya segmi tettwaker La Joconde !

Anwa yettun tadyant n tukerḍa n La Joconde deg  usalay n Louvre di Paris ass n 21 ɣuct 1911 ?
Tukerḍa n tfelwit-a i yessuneɣ unaẓur amekla Léonardo De Vinci gar 1502 d 1506 i yettwassnen s waṭas deg umezruy n tẓuri, tegla-d s wurrif n yimezdaɣ n Paris.

Zrin 2 n yiseggasen iwakken ufan-tt-id rnan ṭṭfen win i tt-yukren. Amakar-a yenna-asen dakken yuker tafelwit-a … acku iḥemmel tamurt-is ! 
Ass-nni n Arim, ɣef 7 n tenzayt, Vincenzo Peruggia, d amekla n yixxamen, 30 n yiseggasen di leεmer, yekcem sdaxel n usalay n Louvre, s yiwet n tewwurt yeffren. Yessen akken iwata amkan-a: dinna i yexdem ilindi-nni imi s-yexdem zzağ i tfelwit-a i d-ttẓurun yakan tuget n yimdanen.
Di kra n wakud kan, yekkes-d tafelwit-a, yeffer ddaw n ddruğ. Dinna, yekkes-as akatar-ines i tfelwit-a i yesseuneɣ Léonardo De Vinci ɣef usefsaf. Iger-itt sdaxel n uceṭṭid, yessenser iman-is ɣer berra.
D sin n yinaẓuren i d-yusan ad d-alsen asuneɣ n tafelwit-a i ifaqen s wanect-a. Nudan fell-as ur tt-ufin ara armi walan akatar-is ddaw n ddruğ! Dinna i ssawḍen taluft ɣer yimsulta i yebdan anadi ɣef yimukar n Mona Lisa...

  Karim Kherbouche 

Comments

[Linda]

Tamacahut-a n Mona Lisa werɛad d-skeflen akk tilawt-ines. D asaru ur nettfakka. Twalaḍ, a Karim, ayen gan inaẓuren n zik werǧin zemren ad t-gen wid n wass-a.
D ifnetruren n tmusni-nsen iwumi ttalsen tuffẓa yinaẓuren n tallit-a tamirant.
Tanemmirt imi d-terniḍ tutlayt-nneɣ, tin akken i tḥemmleḍ aṭas, iɣef tezgḍ tettmeslayeḍ. Akka tura, ẓriɣ d akken tessawḍeḍ ɣer yiwet gar tlufa iwumi tgiḍ
azal meqqren.

Tameddakelt-ik, Linda si Larebɛa Nat Yiraten  

[Sissa]

Tanemmirt-ik a gma ɣef umagrad-a igerzen nezzeh ! Win yebɣan tamziɣt akka i ilaq ad ig. Tamaziɣt di Internet mačči d awal kan skud llan Yimaziɣen i k-yecban a Karim Kherbouche !